Tamil Nadu: തമിഴ്‌നാട്ടിലെ പ്രധാന ക്ഷേത്രങ്ങളിൽ മൊബൈൽ ഫോണുകൾക്ക് കർശന നിരോധനംadline

തമിഴ്നാട്: ക്ഷേത്രങ്ങളുടെ പവിത്രത സംരക്ഷിക്കുന്നതിനും സോഷ്യൽ മീഡിയയ്ക്കായുള്ള റീലിസ് ചിത്രീകരണം തടയുന്നതിനും തമിഴ്നാട് ദേവസ്വം വകുപ്പ് സംസ്ഥാനത്തെ പ്രധാന ക്ഷേത്രങ്ങൾക്ക് മൊബൈൽ ഫോണുകൾ നിരോധിച്ചു. ഇത് സംബന്ധിച്ച ഉത്തരവ് സർക്കാർ പുറത്തിറക്കിയിട്ടുണ്ട്. ഈ നിയമം സെപ്റ്റംബർ 1 മുതൽ പ്രാവർത്തികമാകും. ഇതോടെ ക്ഷത്രത്തിനുള്ളിൽ പ്രവേശിച്ച ശേഷം ഫോട്ടോകളോ ദൈവങ്ങളുടെയോ വിഗ്രഹങ്ങളുടെയോ അല്ലെങ്കിൽ പ്രാർത്ഥനാ ചടങ്ങുകളുടെയോ വീഡിയോകൾ ആർക്കും പകർത്താൻ കഴിയില്ല. സിനിമാ താരങ്ങളോ മറ്റ് പ്രമുഖ വ്യക്തികളോ വിഐപികളോ സന്ദര്‍ശിക്കാനെത്തിയാല്‍ പോലും ചിത്രീകരണങ്ങള്‍ക്ക് ഇളവ് ഉണ്ടായിരിക്കുന്നതല്ലെന്നും അധികൃതർ അറിയിച്ചിട്ടുണ്ട്. തങ്ങളുടെ മൊബൈൽ ഫോണുകൾ സുരക്ഷിതമായി സൂക്ഷിക്കാൻ ഭക്തര്‍ക്ക് ക്ഷേത്ര കവാടങ്ങളില്‍ പ്രത്യേക ക്ലോക്ക് റൂം സംവിധാനങ്ങള്‍ ഒരുക്കും. ഒരു ഫോണിന് അഞ്ച് രൂപ നിരക്കില്‍ ഫീസ് ഈടാക്കുമെന്നും ഇന്റഗ്രേറ്റഡ് ടെമ്പിള്‍ മാനേജ്‌മെന്റ് സിസ്റ്റം വഴി ഇതിനുള്ള ഔദ്യോഗിക രസീത് കൃത്യമായി നൽകുമെന്നും വ്യക്തമാക്കിയിട്ടുണ്ട്. ഫോണുകള്‍ സൂക്ഷിക്കുന്ന സ്ഥലങ്ങളുടെ സുരക്ഷ ഉറപ്പാക്കാന്‍ സിസിടിവി കാമറകളും സ്ഥാപിക്കും. ക്ഷേത്ര വളപ്പിലും പ്രവേശന കവാടങ്ങളിലും മൊബൈല്‍ ഫോണ്‍ ഉപയോഗം നിരോധിച്ചു കൊണ്ടുള്ള മുന്നറിയിപ്പ് ബോര്‍ഡുകള്‍ പ്രദര്‍ശിപ്പിക്കുമെന്നും അനൗണ്‍സ്‌മെന്റുകള്‍ നടത്തുമെന്നും അധികൃതര്‍ അറിയിച്ചിട്ടുണ്ട്.