Russia-Ukraine: 'സെലെന്‍സ്കിയേക്കാള്‍ സമാധാന കരാറിന് താല്‍പ്പര്യം പുടിന്'- ഡൊണാൾഡ് ട്രംപ്

സമാധാന കരാറിനായി ഏറെ ആഗ്രഹിക്കുന്നത് യുക്രെയ്ൻ പ്രസിഡന്റ് വൊളോഡിമിർ സെലെൻസ്കിയേക്കാൾ റഷ്യൻ പ്രസിഡന്റ് വ്ളാഡിമിർ പുടിനാണെന്ന് യുഎസ് പ്രസിഡന്റ് ഡൊണാൾഡ് ട്രംപ്. ഊർജമേഖലയിലെ വെടിനിർത്തൽ ധാരണ റഷ്യ ലംഘിക്കുന്നുവെന്ന യുക്രെയ്ന്റെ ആരോപണങ്ങൾക്കിടയിലാണ് വൈറ്റ് ഹൗസിൽ വെച്ച് മാധ്യമങ്ങളോട് ട്രംപ് ഇക്കാര്യം വ്യക്തമാക്കിയത്.

റഷ്യ യുക്രെയ്നുമേൽ നടത്തുന്ന തുടർച്ചയായ ആക്രമണങ്ങളെക്കുറിച്ചും ഊർജ അടിസ്ഥാന സൗകര്യങ്ങൾക്ക് മേലുള്ള ആക്രമണങ്ങളെക്കുറിച്ചും മാധ്യമപ്രവർത്തകർ ചോദിച്ചപ്പോഴാണ് ട്രംപ് ഇപ്രകാരം പ്രതികരിച്ചത്.

'രണ്ട് രാജ്യങ്ങളും സമാധാനത്തെ പിന്തുണയ്ക്കുന്നുണ്ട്. അവർക്ക് ഒരു ധാരണയിലെത്താൻ താൽപ്പര്യവുമുണ്ട് പക്ഷേ എങ്ങനെ ചെയ്യണമെന്ന് അവർക്കറിയില്ല.' ഇരു രാജ്യങ്ങളെയും ഇതിനായി തങ്ങൾ തയ്യാറാക്കുമെന്ന് ട്രംപ് വ്യക്തമാക്കി.

ഇരുരാജ്യങ്ങളും പരസ്യമായി അംഗീകരിച്ച വെടിനിർത്തൽ ഇതുവരെയും ഉണ്ടായിട്ടില്ലെങ്കിലും മോസ്കോയും കീവും തമ്മിൽ ഒരു ധാരണയിലെത്തിക്കാൻ കഴിയുമെന്ന ആത്മവിശ്വാസം ട്രംപ് പ്രകടിപ്പിച്ചു. കഴിഞ്ഞ ദിവസം റഷ്യ വെടിനിർത്തൽ ലംഘിച്ചുവെന്ന റിപ്പോർട്ടുകളെക്കുറിച്ചുള്ള മാധ്യമപ്രവർത്തകരുടെ ചോദ്യത്തിന് സാഹചര്യം എന്താണെന്ന് താൻ പരിശോധിക്കേണ്ടതുണ്ടെന്നായിരുന്നു അദ്ദേഹത്തിന്റെ മറുപടി. അതേസമയം വെടിനിർത്തൽ ലംഘനങ്ങളുടെ ഉത്തരവാദിത്തം മോസ്കോയുടെ മേൽ മാത്രം ചുമത്താനാവില്ലെന്ന സൂചനയും അദ്ദേഹം നൽകി.

സംഘർഷത്തിൽ ആളപായം വർദ്ധിച്ചുവരുന്നതായി ചൂണ്ടിക്കാണിച്ച ട്രംപ്, ജീവനുകൾ നഷ്ടപ്പെടുന്നത് തുടരുന്നത് സമാധാന ചർച്ചകൾ അടിയന്തിരമാക്കുന്നുവെന്നും വാദിച്ചു. കൊല്ലപ്പെട്ടവരിൽ അധികവും യുവ സൈനികരാണെന്നും അദ്ദേഹം കൂട്ടിച്ചേർത്തു.

2022 ഫെബ്രുവരിയിലാണ് റഷ്യ യുക്രെയ്നുമേൽ പൂർണ്ണ തോതിലുള്ള അധിനിവേശം ആരംഭിച്ചത്. ഇത് വർഷങ്ങളോളം നീണ്ട പോരാട്ടത്തിലേക്കും വൻ നാശനഷ്ടങ്ങളിലേക്കുമാണ് നയിച്ചത്.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിലും. ZEE MALAYALAM App ഡൗൺലോഡ് ചെയ്യൂ. Android Link. ഞങ്ങളുടെ സോഷ്യൽ മീഡിയ പേജുകൾ സബ്‌സ്‌ക്രൈബ് ചെയ്യാൻ X (Twitter), Facebook ലിങ്കുകളിൽ ക്ലിക്കുചെയ്യുക.

ഏറ്റവും പുതിയ വാര്‍ത്തകൾക്കും വിശേഷങ്ങൾക്കുമായി സീ മലയാളം ന്യൂസ് ടെലഗ്രാം ചാനല്‍ സബ്‌സ്‌ക്രൈബ് ചെയ്യൂ. നിങ്ങളുടെ പിൻകോഡിലെ പുതിയ വാർത്തകളും വിശേഷങ്ങളും ഉടൻ അറിയാം. ഡൗൺലോഡ് ചെയ്യൂ പിൻന്യൂസ്.