RBI FPIs KYC Rules: വിദേശ നിക്ഷേപകർക്ക് ആശ്വാസവുമായി ആർബിഐ; കെവൈസി നടപടിക്രമങ്ങൾ ലളിതമാക്കി

വിദേശ നിക്ഷേപകർക്ക് ആശ്വാസ വാർത്തയുമായി റിസർവ് ബാങ്ക് ഓഫ് ഇന്ത്യ (RBI). വിദേശ പോർട്ട്‌ഫോളിയോ നിക്ഷേപകർക്ക് (FPIs) വേണ്ടിയുള്ള കെവൈസി (KYC) രേഖകൾ സമർപ്പിക്കുന്നതിനുള്ള നടപടിക്രമങ്ങൾ ആർബിഐ ലളിതമാക്കി. വിദേശ രാജ്യങ്ങളിലെ അംഗീകൃത അധികാരികൾ സാക്ഷ്യപ്പെടുത്തിയ കെവൈസി രേഖകളുടെ ഒറിജിനൽ പകർപ്പുകൾ ഇനി മുതൽ ബാങ്കുകൾക്ക് സ്വീകരിക്കാമെന്ന് ആർബിഐ അറിയിച്ചു.

സെപ്റ്റംബർ 18-ന് പുറത്തിറക്കിയ പുതിയ ഭേദഗതി ഉത്തരവിലൂടെയാണ് ഈ മാറ്റം നിലവിൽ വന്നത്. നോൺ-റെസിഡന്റ് ഇന്ത്യൻസിനും (NRIs) പ്രവാസി ഇന്ത്യൻ വംശജർക്കും (PIOs) നിലവിൽ ലഭ്യമായിരുന്ന ഇളവാണ് ഇപ്പോൾ വിദേശ പോർട്ട്‌ഫോളിയോ നിക്ഷേപകർക്കും ആർബിഐ നീട്ടി നൽകിയിരിക്കുന്നത്.

ആർബിഐ അംഗീകരിച്ചിട്ടുള്ള വിദേശത്തെ നോട്ടറി പബ്ലിക്, കോടതി മജിസ്‌ട്രേറ്റ്, ജഡ്ജി, ഇന്ത്യൻ എംബസി അല്ലെങ്കിൽ അംഗീകൃത ബാങ്ക് ശാഖകൾ എന്നിവയിലൊരാൾ സാക്ഷ്യപ്പെടുത്തിയ ഒറിജിനൽ രേഖകളുടെ പകർപ്പുകൾ ഇനി ഇന്ത്യൻ ബാങ്കുകൾക്ക് സമർപ്പിക്കാം. വിദേശത്തുള്ള നിക്ഷേപകർക്ക് ഇന്ത്യയിലേക്ക് രേഖകൾ അയച്ച് സാക്ഷ്യപ്പെടുത്തേണ്ട ബുദ്ധിമുട്ട് ഇതിലൂടെ ഒഴിവാകും.

ഒന്നിലധികം രാജ്യങ്ങളിൽ പ്രവർത്തിക്കുന്ന എഫ്പിഐകൾക്ക് ഇത് വലിയ സഹായമാണ്. രേഖകൾ സമർപ്പിക്കുന്ന രീതി ലളിതമാക്കിയെങ്കിലും ബാങ്കുകൾ നിക്ഷേപകരുടെ കെവൈസി പരിശോധനകൾ കർശനമായി നടത്തണമെന്ന നിയമത്തിൽ യാതൊരു മാറ്റവുമില്ല.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിലും.ZEE MALAYALAM App ഡൗൺലോഡ്ചെയ്യൂ.Android Link.